Gəlib çıxmamışam hələ özümə,
Bir boylanım görüm harada qaldım?
Hərə bir dəstəylə ağ günə çıxdı,
Mən elə tək-tənha qarada qaldım.
Dünyanın xeyiri, şəri olmadım,
Ölə bilməsəm də, diri olmadım…
Heç işdə sıradan biri olmadım,
Hər işdə sonuncu sırada qaldım.
Hərəsi özünə bir “tərəf” edib ,
Hərə bir tərəfdə qapdığın yedi…
Türk “talış” söylədi,talış “türk” .- dedi,
Heç kim götürmədi, arada qaldım.
Dünya zindan oldu, ömürsə cəza,
Əliboş çıxmadım hər gələn yaza.
Bir ömür yaşadım söz yaza-yaza,
Dünyada yarada-yarada qaldım.
Şükr Varlığına, məni Yaradan!
Razıyam Sən verən dərddən, yaradan.
Harda sən “get” dedin, getdim oradan,
Harda sən “qal” dedin, orada qaldım.