BÖYÜKAĞA AĞA - BEYDEMIR

Pomidor

Xaçmaz pomidoruna

Millətin dərdi, səri səninlə olub həmişə,

Tapmısan bu bölgədə çox böyük ad-san, pomidor.

O qədər məşhur olub şimal bölgəsində adın,

Xaçmaz ilə çəkilir indi yanbayan, pomidor.

Hər il fevral ayında cücərib səməni kimi,

Səpirik şitillikdə, olursan mehman, pomidor.

Yarım hektar əkmişəm, az qalıb ki, canım çıxa,

Qiymətin xəstə edib, qan qusuram, qan, pomidor.

Bir yeşik qırxca kilo, hər kiloda beşcə qəpik,

Arvad da beş qəpiyə eyləyir idman, pomidor.

Həm dərir, həm daşıyır tək arvadım əlli yeşik,

Çağırmışam Ginnesi, etsin qəhrəman, pomidor.

Oğluma toy eləyib, qıza cehiz almalıyam,

Bu qiymətə nə edim, ay filan-filan, pomidor.

Bir dənə afrikalı sarı banan bir manata,

Utanıb gir yerə də, tağda qızaran pomidor.

Zavod qarşısındakı izdihamda nələr olmur,

Növbədə əzab çəkir yüzlərlə insan, pomidor.

Bir daha Böyükağa əkməyəcəkdir səni, bil,

Hökmünü veribdir artıq, edir elan, pomidor.

Əkməz

Mənim dərdlərimə yanan tapılmır,

Dedim ki, gəl otur, ürək dostu ol.

Həyatın hər üzün görüb gəlmişəm,

Süfrəmə əl uzat, çörək dostu ol.

Kinayə eləyib demə dəlidir,

Arxamca danışma, dost olmaz böylə.

Necə ürəyim var sənə bəllidir,

Qəlbində nəyin var üzümə söylə.

Təriflə yıxırsan dostun evini,

Bilirəm, yaltaqlıq peşəndir sənin.

Yəqin yavan gəldi duz-çörək sənə,

Sən, yaltaq dostusan yağlı tikənin!

Duz-çörək dostunun qiyməti olmur,

Onun ağırlığın mizan da çəkməz.

Dostluqla əkilən gül-çiçək solmur,

Ağa dost yolunda kol, tikan əkməz!

Azərbaycan bayrağı

Şəhid olan kəslərin özünün dəyanəti,

Üç rəngin birliyində cahanın əzəməti.

Dik baxdılar ölümə, çəkinmədilər qəti,

Yalın şəhid əlinin avtomatı, darağı –

Azərbaycan Bayrağı.

Qan üstünə düzülən gülümə bax, gülümə,

İyirmi ildən artıq dözürük bu zülümə.

Haydı igidlər, haydı, salam deyək ölümə,

Qıraq, vaxtı çatıbdı, bu tilsimi, sınağı –

Azərbaycan Bayrağı.

Şəhidimiz olmasın, tabut üstə sərməyək,

Təzə, tər qərənfili məzar üçün dərməyək.

Düşmənin canın alaq, canımızı verməyək,

İgid başına qoyar ay-ulduzlu papağı, –

Azərbaycan Bayrağı.

Yumruq kimi birləşib, tam bütövdür bu ölkə,

Birlikdən yağıların qəlbinə çökür kölgə.

Nə torpaqdan, nə daşdan pay verilməz bir tikə,

Bu torpağın olmayıb heç bir zaman ortağı, –

Azərbaycan Bayrağı.

Dünya meydanlarında rəqibindən bac alır,

İgid Vətən övladı baxıb ona güc alır.

Dünyanın hər yerində əzəmətlə ucalır,

Məni rahat buraxmır Qarabağın qınağı –

Azərbaycan Bayrağı.

Nə o yan, nə bu yandan istəmirik qan olsun,

Sülhün carçısıyıq biz, qoy sülhə qurban olsun.

Azərbaycana dünya, bax belə heyran olsun.

Atomdan da güclüdür nifrət adlı yarağı, –

Azərbaycan Bayrağı.

İgidlərin durduğu səngərlərdə dalğalan,

Anaların dilində, laylalarda havalan.

Körpələrlə beşikdə, nənnilərdə yırğalan,

Ana üçrəng bayrağa bükməlidir qundağı, –

Azərbaycan Bayrağı.

Ay-ulduzun şöləsin Dərbənd görsün şimaldan,

Şəninə tərif desin Təbriz qədim mahaldan.

Türklərin bayrağına pay düşübdür hilaldan,

Məkan seçək sancmağa dünyada hündür dağı,

Azərbaycan Bayrağı.

Ucalarda dalğalan Azərbaycan Bayrağı!

Azərbaycan Bayrağı!

Olana
31 dekabr Dünya Azərbaycanlılarının Həmrəylik Gününə

Ay -ulduz bəzəkdir kəhkəşan üçün,

Bir insan yükünü daşıyan üçün.

Dünya cənnətdir e, yaşayan üçün,

Həmxasiyyət olub, həmrəy olana!

Mənəm-mənəm deyib gəzən nə qədər,

Bəy, xan ölüb gedib, nökərdi rəncbər

Nurundan bəxş edər hər gün, hər səhər,

Həmxasiyyət olub, həmrəy olana!

Günəş hərarətli, torpaq ruhlu ol,

Sənindir bu dünya: ön, arxa, sağ, sol.

Yerdən səmalara açılacaq yol,

Həmxasiyyət olub, həmrəy olana!

Torpaq cana gəldi şəhid qanından,

Hər insan keçməyir şirin canından.

Vətən də verəcək öz ad-sanından,

Həmxasiyyət olub, həmrəy olana!

Təbiət göstərir səxavətini,

Yaltaq, riyakarın olmaz mətini.

Ağa da bölüşər öz niyyətini,

Həmxasiyyət olub, həmrəy olana!

Əsgər qardaşım

Şəhidinin qanı getməsin hədər,

Salamla şəfəqi Murovda, əsgər.

Düşməni qanında boğana qədər

Qoy olsun balışın səngər, qardaşım,