Ceyhun Hesenzade - Nə qədər yığmısınız xəlvətə, doymur gözünüz

DOYMUR GÖZÜNÜZ

Çətin olsun, sizi hər hansı bir ərzaq doyurar?

Bu doyumsuzluğu bir gün qara torpaq doyurar,

Yox inam da buna hərçənd, sizi ancaq doyurar,

Pulunuz çox, necə var-dövlətə doymur gözünüz?

Qənim olmuş bu tamah millətə, doymur gözünüz.

Gəlişiynən əcəlin tez kəsilər dığ-dığınız,

Son-axır mənzil olur, mütləq ölüb sığdığınız,

Sizə bəs etmir axı, heç bu qədər yığdığınız?

Bulaşır hər şeyiniz rüşvətə, doymur gözünüz.

Pulunuz çox, necə var-dövlətə doymur gözünüz?

Düşünüb millətə hər gün qura bildin tələ gör?

Gətirib işləri saldın nə sayaq əngələ gör,

Bilirik, var nəyiniz aşikar-üzdən, hələ gör,

Nə qədər yığmısınız xəlvətə, doymur gözünüz,

Pulunuz çox, necə var-dövlətə doymur gözünüz?

Çağırın, yardım edin, millət ölür, məcbur olur,

Çoxu çox arzusuna həsrət ölür, məcbur olur,

Qalıb işsiz, yatır ac, külfət ölür, məcbur olur,

Gedən ancaq yol alır qürbətə, doymur gözünüz,

Pulunuz çox, necə var-dövlətə doymur gözünüz?

Yaşayan sizlər olun, lap eləyin yüz qələti,

Necə sığdırmısınız bir sifətə yüz sifəti?

Kasıbın son qəpiyindən gözünü çəkmə qəti,

Şişir ey, dur hava vur qiymətə, doymur gözünüz,

Pulunuz çox, necə var dövlətə doymur gözünüz?

Yox ümid heç gələcəkdən yana, dur keçmişə bax,

Yaman azğınlaşıb artıq, hər əməl, vərdişə bax,

Nəfisindən sığınır Allaha şeytan, işə bax,

Sizə baxdıqca gəlir heyrətə, doymur gözünüz.

Pulunuz çox, necə var-dövlətə doymur gözünüz?

Çıxıb ərşə bu zülüm xeyli zamandır, daha dur,

Vəziyyət pis, solub əhval ki yamandır, daha dur,

Yetər artıq, dirənib, zülmü dayandır daha, dur,

Gəlin azca təmiz ar-qeyrətə, doymur gözünüz,

Pulunuz çox, necə var-dövlətə doymur gözünüz?

«PENSİYANER»LƏRİN ADINDAN

Silinən çirkli pulun hoqqası çox pensiyada,

Qur oyun, pulları yığ, millətə sox pensiyada,

Çoxu onsuz tez ölür, qisməti yox pensiyada,

Yaşamır, «pensiyaner»lər narazı, pensiya ver.